ಚಾಮರಾಜನಗರ, ಅ.24: ಇಂದು ಚಾಮರಾಜನಗರ ಸಾಮಾನ್ಯ ಚಾಮರಾಜನಗರವಾಗಿರಲಿಲ್ಲ. ಬೆಳಿಗ್ಗೆ ಎದ್ದಾಗ ಮುಗಿಲು ಕಪ್ಪಾಗಿತ್ತು. ತುಂತುರು ಮಳೆ ಹನಿ ಹನಿಯಾಗಿ ಇಳಿಯುತ್ತಿತ್ತು. ಆದರೆ ಆ ಮಳೆ, ನಗರದ ಉತ್ಸಾಹವನ್ನು ಕೊಚ್ಚಿಕೊಂಡು ಹೋಗಲು ಸಾಧ್ಯವಾಗಲಿಲ್ಲ. ಬದಲಾಗಿ ಆ ಮಳೆಯೇ ಪವಿತ್ರವಾಯಿತು.
ಕಾರಣ… ಅಂತರಾಷ್ಟ್ರೀಯ ಬೌದ್ಧ ಮಹಾ ಸಮ್ಮೇಳನಕ್ಕೆ ಇಂದು ವೈಭವದ ಚಾಲನೆ ಸಿಕ್ಕಿತು.
ಮಳೆಯ ನಡುವೆಯೇ ಧಮ್ಮ ನಡಿಗೆಗೆ ಚಾಲನೆ: ರಾಮಸಮುದ್ರ ದ ಬಾಬಾ ಸಾಹೇಬರ ಕಂಚಿನ ಪುತ್ಥಳಿಯ ಮುಂದೆ ನೂರಾರು ಜನರು. ಕೈಯಲ್ಲಿ ನೀಲಿ, ಬಿಳಿ ಧ್ವಜ, ಬಾಯಲ್ಲಿ “ಬುದ್ಧಂ ಶರಣಂ ಗಚ್ಛಾಮಿ” ಘೋಷಣೆ. ಜಿಲ್ಲಾ ಉಸ್ತುವಾರಿ ಸಚಿವ ಸಿ.ಪುಟ್ಟರಂಗಶೆಟ್ಟಿ ಅವರು ಮಳೆಯಲ್ಲೇ ನಿಂತು ಚಾಲನೆ ನೀಡಿದರು. ಪ್ರತಿಯೊಬ್ಬರಿಗೂ ಇದು ನಡಿಗೆಯಲ್ಲ, ಅದು ಬುದ್ಧನಡೆಗೆ ನಡೆದ ಯಾತ್ರೆಯಾಗಿತ್ತು.
ಶ್ರೀಲಂಕಾ ಭಂತೇಜಿಯಿಂದ ಚಾಲನೆ: ಡಾ.ಬಿ.ಆರ್.ಅಂಬೇಡ್ಕರ್ ಜಿಲ್ಲಾ ಕ್ರೀಡಾಂಗಣ, ಇಷ್ಟು ಆಟದ ಮೈದಾನವಾಗಿದ್ದ ಜಾಗ ಇಂದು ಧಮ್ಮದ ಪುಣ್ಯಕ್ಷೇತ್ರವಾಗಿತ್ತು. ಶ್ರೀಲಂಕಾದ ಕೊಲಂಬೊ ವಿಶ್ವವಿದ್ಯಾಲಯದ ಶೀಲವಂಶ ಮಹಾಥೆರೋ ಬಂತೇಜಿ ಅವರು ಕಣ್ಣು ಮುಚ್ಚಿ ಮಂತ್ರ ಪಠಿಸಿದಾಗ, ಇಡೀ ಕ್ರೀಡಾಂಗಣ ಮೌನವಾಯಿತು. ಆ ಮೌನದಲ್ಲಿ ಬುದ್ಧ ಇದ್ದ. ನಂತರ ಸಂಗೀತವನ್ನು ಒಳಗೊಂಡ ಪಂಚಶೀಲ ಮತ್ತು ಅಷ್ಟಾಂಗ ಮಾರ್ಗದ ಪಠಣ ಮತ್ತೆ ನೆರೆದ ಜನರನ್ನು ಮೌನಕ್ಕೆ ದೂಡಿತು. ಬಳಿಕ ನಗರಾಭಿವೃದ್ಧಿ ಸಚಿವ ಡಾ.ಯತೀಂದ್ರ ಸಿದ್ದರಾಮಯ್ಯ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿ, ಬುದ್ಧನಿಲ್ಲದಿದ್ದರೆ, ನಾನು ಇಂದು ಈ ಸ್ಥಾನದಲ್ಲಿ ಇರುತ್ತಿರಲಿಲ್ಲ. ಅಂಬೇಡ್ಕರ್ ಇಲ್ಲದಿದ್ದರೆ, ನಾವೆಲ್ಲ ಇಲ್ಲಿ ಸೇರುತ್ತಿರಲಿಲ್ಲ. ಯಾವುದೇ ಧರ್ಮದ ಅಡಿಯಲ್ಲಿ ದೇಶ ನಡೆಯಲು ಸಾಧ್ಯವಿಲ್ಲ. ಎಲ್ಲಾ ಧರ್ಮಗಳಿಗೂ ಸಮಾನ ಅವಕಾಶ ನೀಡಿದ ಸಂವಿಧಾನವೇ ನಮಗೆ ಶ್ರೇಷ್ಠವಾಗಬೇಕು ಎಂದರು.
ವೇದಿಕೆಯಲ್ಲಿ ಮೈಸೂರಿನ ಉರಿಲಿಂಗಪೆದ್ದಿ ಮಠದ ಶ್ರೀ ಜ್ಞಾನ ಪ್ರಕಾಶ ಸ್ವಾಮೀಜಿ, ಸಚಿವ ಸಿ.ಪುಟ್ಟರಂಗಶೆಟ್ಟಿ, ಸಮ್ಮೇಳನ ಆಚರಣಾ ಸಮಿತಿ ಅಧ್ಯಕ್ಷ ಹಾಗೂ ಶಾಸಕ ಎ.ಆರ್.ಕೃಷ್ಣಮೂರ್ತಿ, ಗೌರವಾಧ್ಯಕ್ಷ ಮನೋರಖ್ಖಿತ ಭಂತೇಜಿ, ಸ್ವಾಗತ ಸಮಿತಿ ಸಂಚಾಲಕ ವೆಂಕಟರಮಣಸ್ವಾಮಿ(ಪಾಪು), ಮಾಜಿ ಶಾಸಕರಾದ ಜಿ.ಎನ್.ನಂಜುಂಡಸ್ವಾಮಿ, ಎಸ್.ಬಾಲರಾಜ್, ಆರ್.ನರೇಂದ್ರ, ಎ.ಆರ್.ಬಾಲರಾಜ್, ಮುಖಂಡರಾದ ಅಯ್ಯನಪುರ ಶಿವಕುಮಾರ್, ಎನ್.ನಾಗಯ್ಯ, ಪಿ.ಮರಿಸ್ವಾಮಿ, ಎಸ್ಸಿ ಎಸ್ಟಿ ನೌಕರರ ಸಂಘದ ರಾಜ್ಯಾಧ್ಯಕ್ಷ ಚಂದ್ರಶೇಖರಯ್ಯ, ಆರ್.ಮಹದೇವ್ ಹಾಗೂ ಇತರರು ಹಾಜರಿದ್ದರು.
ಒಂದು ಲಕ್ಷಕ್ಕೂ ಮಿಕ್ಕಿ ಜನ!: ಆಯೋಜಕರ ಅಂದಾಜು ಸುಳ್ಳಾಗಲಿಲ್ಲ. ಲಾವೋಸ್, ಶ್ರೀಲಂಕಾ, ಥೈಲ್ಯಾಂಡ್, ಮ್ಯಾನ್ಮಾರ್ ನಿಂದ ಬಂದ ಬಿಕ್ಕುಗಳು, ದಲಿತ ಕೇರಿಗಳಿಂದ ಬಂದ ಅಜ್ಜಿಯರು, ಕಾಲೇಜು ಯುವಕರು. ಎಲ್ಲರೂ ಒಂದೇ ಸೂರಿನಡಿ ಸೇರಿದ್ದರು. ಊಟದ ಸಾಲು, ಪುಸ್ತಕ ಮಳಿಗೆಯಲ್ಲಿ ನೂಕು ನುಗ್ಗಲು, ಕವಿಗೋಷ್ಠಿ, ವಿಚಾರಗೋಷ್ಠಿಗಳು ನಿರಂತರವಾಗಿ ಸಾಗಿತು. ಒಬ್ಬ 80 ವರ್ಷದ ಅಜ್ಜಿ ಹೇಳಿದ ಮಾತು – “ನನ್ನ ಜೀವನದಲ್ಲಿ ಬುದ್ಧನ ಹೆಸರಲ್ಲಿ ಇಷ್ಟು ದೊಡ್ಡ ಹಬ್ಬ ನೋಡಿದ್ದು ಇದೇ ಮೊದಲು. ಸಾಯುವ ಮುನ್ನ ನೋಡಿದೆ, ಧನ್ಯಳಾದೆ.” ನಿಜಕ್ಕೂ ಸಮ್ಮೇಳನದ ಮಹತ್ವವನ್ನು ಸಾರಿತು.
ಇಂದು ಕೇವಲ ಆರಂಭ: ಇದು ಎರಡು ದಿನಗಳ ಹಬ್ಬ. ನಾಳೆ ಮಾಜಿ ಸಿಎಂ ಸಿದ್ದರಾಮಯ್ಯ ಅವರ ಸಮಾರೋಪ ಭಾಷಣದೊಂದಿಗೆ ಮುಕ್ತಾಯವಾಗಲಿದೆ. ಆದರೆ ಚಾಮರಾಜನಗರ ಕೊಟ್ಟ ಸಂದೇಶ ಸ್ಪಷ್ಟ – ಮಳೆ ಬರಬಹುದು, ಬಿರುಗಾಳಿ ಬರಬಹುದು, ಆದರೆ ಮನುಷ್ಯ ಮನುಷ್ಯನನ್ನು ಪ್ರೀತಿಸುವ ಧಮ್ಮದ ಬೆಳಕನ್ನು ಯಾರೂ ಆರಿಸಲು ಸಾಧ್ಯವಿಲ್ಲ.